Чым плануе Міхаіл Жамчужны займацца пасля выхада на волю?

Былы палітвязень Міхаіл Жамчужны распавёў сайту palitviazni.info, што пасля выхаду на волю яму “спачатку трэба аглядзецца”.

“Зараз, што называецца, адаптуюся да грамадзянскага жыцця, – кажа Міхаіл Жамчужны.Усё-такі больш за шэсць год быў у зусім іншай абстаноўцы, шмат часу праводзіў у ШІЗА і ПКТ, а гэта закрытыя прасторы. Таму зараз свабода, якая на мяне абрынулася, крыху цісне…”

Нагадаем, што былога 65-гадовага праваабаронцу і цяпер ужо экс-палітвязня Міхаіла Жамчужнага вызвалілі з Горацкай папраўчай калоніі 19 лютага.

У гэтай калоніі яго трымалі ад 13 ліпеня 2017 году, а наагул у калоніях строгага рэжыму Жамчужны прабыў шэсць з паловай гадоў.

10 чэрвеня 2015 году Віцебскі абласны суд прызнаў яго вінаватым у падбухторванні да наўмыснага выдаваньня звестак, якія складаюць службовую таямніцу, незаконным набыцці сродкаў для сакрэтнага атрымання інфармацыі, а таксама ў даванні хабару.

— Зараз, што называецца, адаптуюся да грамадзянскага жыцця, – кажа Міхаіл Жамчужны. – Усё-такі больш за шэсць год быў у зусім іншай абстаноўцы, шмат часу праводзіў у ШІЗА і ПКТ, а гэта закрытыя прасторы. Таму зараз свабода, якая на мяне абрынулася, крыху цісне, у псіхалагічным плане трэба прызвычаіцца да гэтай рэальнасці.

Дарэчы, у першую ноч пасля выхаду на волю я амаль не спаў. Прыкладна тры гадзіны ўдалося паспаць, а ўвесь астатні час асвойваў новы тэлефон, які мне падарылі сябры.

Далей былі шматлікія інтэрв’ю, гутаркі з калегамі-праваабаронцамі. Таксама кватэру трэба было абсталёўваць, бо, калі прыехаў, там былі проста голыя сцены. Уся маёмасць была канфіскавана, але зараз, дзякуй Богу, за два дні з дапамогай грамады знайшоў і мэблю, і посуд, і адзенне.

— Якія ў вас бліжэйшыя планы?

— Найперш трэба аглядзецца, як кажуць зарыентавацца ў абстаноўцы. Але, відаць, буду дзейнічаць у тым жа праваабарончым накірунку, што і раней.

— Вы шмат часу праводзілі ў ШІЗА і ПКТ. Ці адбілася гэта на здароўі?

– У ШІЗА і ПКТ я знаходзіўся са жніўня 2017 году. У штрафным ізалятары правёў 520 сутак, пры гэтым было нават 100 сутак запар.

Але на здароўі гэтыя выпрабаванні моцна не адбіліся. Я займаўся рэгулярна спортам, сачыў за сабой, наколькі гэта было магчыма ў тых умовах.

— Зараз вы знаходзіцеся пад прэвентыўным наглядам міліцыі?

— Так, у мяне зараз дастаткова шмат абмежаванняў. Напрыклад, забаронена пакідаць Віцебск, выходзіць з кватэры з 9 гадзін вечара і да 6-і раніцы. Трэба двойчы на месяц адзначацца ў міліцыі.

Зыходзячы з гэтага, і буду будаваць свае далейшыя планы. Не хацелася б даваць нагоду сілавікам, каб тыя ізноў мяне накіравалі за краты.

palitviazni.info

Фота: vitebskspring.org

Іншыя палітычныя вязьні