Што здзівіла Зміцера Дашкевіча?

Лідар «Маладога Фронту» і былы палітвязень Зміцер Дашкевіч атрымаў паведамленне пра спыненне крымінальнай справы па ч.3 арт.293 «Арганізацыя масавых беспарадкаў» з прычыны «адсутнасці ў дзеянні складу злачынства».

“Не памятаю выпадкаў, каб узбуджалі справу, абвінавачвалі, а затым спускалі яе на тармазах і, тым самым, па сутнасці прызнаваліся ў сваіх памылках”, – заявіў Зміцер сайту palitviazni.info.

«Шчыра сказаць, я б менш зьдзівіўся, каб мяне пасадзілі ізноў. Трэба прызнаць, створаны 20 сакавіка адзьдзел фантастыкі ГБ спрацаваў нестандартна. Месяц пратрымаць па турмах і заявіць: «у вашых дзеяньнях няма складу злачынства» — такога, на маёй памяці, з КДБ яшчэ не здаралася. Гэта наша агульная невялікая перамога. А вялікая будзе тады, калі ўсе затрыманыя па «справе патрыётаў» атрымаюць гэткія ж паперкі. Зараз пайду забіраць 16 канфіскаваных бел-чырвона-белых сьцягоў і банэр «Пагоні». Жыве Беларусь!» — напісаў Зміцер у сваім фэйсбуку.

– Вельмі здзівіўся, калі даведаўся, што справу спынілі, таму што ў маіх дзеяннях няма складу злачынства, – распавядае Зміцер Дашкевіч. – Тады ўзнікае лагічнае пытанне: за што кідалі за краты, арганізоўвалі ўвесь гэты цырк з затрыманнем? І я насамрэч не памятаю выпадкаў, каб узбуджалі справу, абвінавачвалі, а затым спускалі яе на тармазах і, тым самым, па сутнасці прызнаваліся ў сваіх памылках.

– У такім выпадку, што гэта было?

– Я і раней казаў, што ўсё гэта нагадвала нейкі прыступ істэрыі ва ўлады на хвалі вясновых пратэстаў. Трэба было знайсці, як кажуць, казлоў адпушчэння. Да таго ж, магчыма, на сітуацыю з затрыманнямі паўплывала і наша барацьба супраць будаўніцтва ў Курапатах, бо за краты кінулі усіх найбольш актыўных абаронцаў.

– Адным словам, вамі вырашылі запужаць, збіць хвалю пратэстаў.

– У пэўным сэнсе – так. Вырашылі надаць большую гучнасць справе.

palitviazni.info

Іншыя палітычныя вязьні