Былы палітычны зняволены Зміцер Дашкевіч арганізаваў акцыю салідарнасці з палітвязнямі, да якой можа далучыцца кожны жадаючы.
“Даслалі палітвязням 78 лістоў, на патрэбы сышло каля 2370 рублёў, – кажа Зміцер. – Праца няпростая, але святая, таму будзе працягвацца…”
Зміцер Дашкевіч паведаміў на сваёй старонцы ў Фэйсбук, што на гэтым тыдні палітвязням даслалі 78 лістоў (дробных пакункаў) і падзякаваў усім, хто дапамагаў матэрыяльна і фізічна.
На патрэбы па адпраўленні лістоў пайшло каля 2370 рублёў, сабрана каля 1290 рублёў, таму кожны можа далучыцца да акцыі салідарнасці.
“Памятайце пра вязняў, нібы самі ўвязненыя разам з імі, – заклікаў усіх да салідарнасці палітвязень апостал Павел, – напісаў Зміцер Дашкевіч. – І я заўсёды стараўся так рабіць, тым больш і хлебу гэтага скаштаваў добра.
Калі палітвязняў было пару дзясяткаў, я сумленна высылаў ім пошту: капэрты, падпіскі, асадкі, сшыткі і самае галоўнае – Эвангельле Таго, Хто і Сам быў несправядліва арыштаваны і несправядліва асуджаны.
Калі палітвязняў сталася сто, я ўжо ледзь управіўся кожнаму выслаць ліст. Цяпер, калі толькі прызнаных палітвязняў 160, а непрызнаных яшчэ некалькі соцень(!) – гэта пераўтварылася ў такую жахлівую статыстыку, якую мозг ужо не ўспрымае.
Але калі чытаеш іхныя імёны, даты нараджэння, кароткія звесткі, калі пра каго ёсць, перад табою паўстаюць дзясяткі і сотні жывых людзей з іхнымі лёсамі, сем’ямі, з іх бядой.
Бацькі і сыны, браты, 18-гадовыя хлопцы і дзяўчыты, студэнты і іх выкладчыкі, блогеры і журналісты, айцішнікі і нават адвакаты, лекары і рабочыя, палітычныя лідары і нікому невядомыя людзі – і ўсіх іх віна ў тым, што яны прагнулі Праўды”.
Па словах Змітра, такі маштаб рэпрэсій цяжка ўсвядоміць і часам “аж рукі апускаюцца ад роспачы”.
“Але ўчора сям’я Максіма Знака засведчыла мне: першае, што дайшло Максіму ў камеру – ліст з капэртамі і Бібліяй, — дадае Зміцер Дашкевіч. – Гэта самае тое, што было патрэбна яму ў цяжкі час. І я натхніўся, што трэба і далей асвятляць палітвязьняў лістамі з волі. Але трэба вашая дапамога – і фінансавая, і фізічная”.
palitviazni.info