Былы палітвязень Зміцер Дашкевіч распавёў сайту palitviazni.info пра тое, што працягваецца збор сродкаў на правядзенне 29 кастрычніка ў Курапатах “Ночы расстраляных паэтаў”.
“Калі грошы застануцца, то накіруем іх на іншыя праекты па тэме Курапатаў”, – кажа суразмоўца.
Нагадаем, што больш за сто паэтаў, пісьменнікаў і грамадскіх дзеячаў былі расстраляны ў ноч з 29 на 30 кастрычніка 1937 года. Каб ушанаваць памяць нявінных людзей на месцы, дзе чыніўся генацыд Беларусі, зараз аб’яўлены збор сродкаў.
“Сродкі пойдуць на добрую справу, — адзначае Зміцер Дашкевіч. — Выдадзены плакаты, флаеры, плануем надрукаваць буклеты і іншую інфармацыйную прадукцыю. Калі грошы застануцца, то накіруем іх на іншыя праекты па тэме Курапатаў і расстрэльнай ночы. А планаў шмат.
За сабраныя сродкі плануем выдаваць кнігі, дыскі, рыхтавацца да наступных мерапрыемстваў. Калі будзе больш сродкаў, то ўжо цяпер пачнем планаваць сур’ёзныя выдавецкія рэчы”.
Са слоў Змітра Дашкевіча, гэта будзе не палітычная акцыя, людзі проста збяруцца, каб ушанаваць памяць людзей у месцы масавага генацыду беларусаў.
“Будуць гучаць вершы, выступяць музыкі, – дадае Зміцер. – Шмат запрасілі паэтаў і пісьменнікаў, музыкантаў, але не хацелася б агучваць іх імёны. Мяркую, што рэклама гэтаму мерапрыемству не патрэбна. Хто захоча — той прыйдзе”.
Пачатак мерапрыемства запланаваны на 20.00, яно працягнецца каля трох гадзін.
palitviazni.info
Фота: tut.by
