Праваабарончая арганізацыя Libereco – Partnership for Human Rights ініцыявала акцыю ў падтрымку Аляся Бяляцкага на інтэрнет-старонцы ў Facebook. Там змешчаны зварот да прэзідэнта Беларусі з патрабаваннем неадкладнага і безумоўнага вызвалення вядомага праваабаронцы.
Пра гэта гаворыцца ў прэс-рэлізе Libereco – Partnership for Human Rights:
Бон
8 жніўня 2011
Беларускі праваабаронца Алесь Бяляцкі быў затрыманыя 4 жніўня 2011 ў Мінску. Libereco – Partnership for Human Rights заклікае да яго неадкладнага і безумоўнага вызвалення.
Праваабарончая арганізацыя распачала акцыю “Мы ўсе за Алеся” на Facebook і заклікае міжнародную і беларускую грамадскасць выказаць салідарнасць са зняволеным праваабаронцам, наведаўшы гэтую старонку ў Facebook і накіраваўшы ліст прэзідэнту Лукашэнку.
Алесь Бяляцкі з’яўляецца старшынёй Беларускага праваабарончага цэнтра “Вясна” і віцэ-прэзідэнтам Міжнароднай федэрацыі за правы чалавека (FIDH). Ён быў затрыманы ў рамках крымінальнай справы, распачатай паводле ч.2 артыкула 243 Крымінальнага кодэкса Рэспублікі Беларусь (“утойванне прыбытку ў асабліва буйным памеры”), што прадугледжвае да 7 гадоў пазбаўлення волі з канфіскацыяй маёмасці.
Беларускія і міжнародныя праваабарончыя арганізацыі мяркуюць, што яго ўтрыманне пад вартай з’яўляецца палітычна матываваным і мае на мэце перашкодзіць яго законнай праваабарончай дзейнасці.
Libereco далучылася да закліку шэрагу міжнародных арганізацый па правах чалавека, уключаючы Human Rights House, Civil Rights Defenders і Human Rights Watch, да неадкладнага і безумоўнага вызвалення Алеся Бяляцкага, якога яны разглядаюць як вязня сумлення.
spring96.org
