Лідар Маладога Фронту Зміцер Дашкевіч надалей знаходзіцца ў медычнай частцы калоніі №13 ў Глыбокім. Ён лечыцца ад пнеўманіі, якой захварэў у штрафным ізалятары. Пра гэта паведаміла яго намесніца па арганізацыі і нявеста Наста Палажанка. Яна наведала калонію разам з адвакатам. 2 жніўня Наста адзначыла дзень нараджэння. І паездку да калоніі, дзе ўтрымліваецца Зміцер Дашкевіч, прымеркавала да свайго асабістага свята. Але сустрэцца з Дашкевічам ёй па-ранейшаму не дазваляюць.
Аднак адвакат сустрэлася са сваім падабаронным. Па словах Насты Палажанкі, Зміцер Дашкевіч адчувае сябе нармальна.
– Адчувае сябе ў парадку. Ён не з тых, хто скардзіцца. Кажа, што адчувае сябе лепей, праходзіць курс лячэння. Да яго раней яшчэ прыходзіў следчы, але ён адмовіўся з ім размаўляць. Таму яны не будуць болей прыходзіць, толькі тады, калі будуць састаўляць абвінавачванне. А гэта, думаю, будзе бліжэй да верасня.
Зміцер Дашкевіч быў асуджаны на 2 гады па артыкуле аб хуліганстве. Але на судзе доказы яго віны не былі пераканаўчымі. Наадварот, паказанні сведак казалі аб правакацыі, якая была ўчынена спецслужбамі напярэдадні прэзідэнцкіх выбараў 2010 года супраць Змітра Дашкевіча і Эдуарда Лобава. Лобаў асуджаны на 4 гады зняволення,.
У сярэдзіне ліпеня стала вядома, што супраць Дашкевіча ўзбуджана яшчэ адна крымінальная справа — нібыта за непадпарадкаванне патрабаванням адміністрацыі калоніі.
racyja.eu
