Сяргей Каваленка адмовіўся пісаць прашэнне аб памілаванні

Сяргей сказаў, што гэта для яго непрымальна.

Віцебскі апазіцыянер, які знаходзіцца ў следчым ізалятары МУС на вуліцы Валадарскага ў Мінску, адмовіўся пісаць прашэнне аб памілаванні. Пра гэта ён паведаміў сваёй маці Лідзіі Каваленка, якая 4 мая сустрэлася з сынам у СІЗА.

Як паведаміла жонка апазіцыянера Алена Каваленка, у ізалятары яго ўгаворвалі напісаць прашэнне аб памілаванні, аднак Сяргей заявіў, што для яго гэта непрымальна.

Нагадаем, у СІЗА на Валадарскага Каваленку этапавалі з Рэспубліканскага навукова-практычнага цэнтра псіхічнага здароўя (Навінкі), дзе амаль на працягу месяца праводзілі экспертызу яго псіхічнага здароўя.

Як паведаміла Алена Каваленка, ва ўпраўленні дэпартамента выканання пакаранняў МУС маці паведамілі, што спецыялісты прызналі яе сына псіхічна здаровым.

Лідзія Каваленка, у сваю чаргу, хадайнічала, каб яе сына, які ўсё яшчэ не акрыяў пасля працяглай галадоўкі, за час якой страціў больш за палову сваёй вагі, паклалі ў цывільную бальніцу, дзе медыкі змаглі б яго абследаваць і аказаць больш якасную, чым у турме, медыцынскую дапамогу. Аднак ёй адмовілі, заявіўшы, што не бачаць у гэтым неабходнасці, паведаміла жонка апазіцыянера.

Яна таксама паведаміла, што, магчыма, ужо ў панядзелак, 7 мая, Сяргея Каваленку этапуюць у Віцебскі СІЗА, дзе ён знаходзіўся першыя два месяцы зняволення і дзе, паводле яго слоў, на яго аказваўся націск, які можна лічыць катаваннямі.

***

Актывіст Кансерватыўна-хрысціянскай партыі — БНФ Сяргей Каваленка знаходзіцца ў зняволенні з 19 снежня 2011 года. 24 лютага 2012 года суд Першамайскага раёна Віцебска прызнаў яго вінаватым ва ўхіленні ад адбывання пакарання ў выглядзе абмежавання волі (арт. 415 КУК). Гаворка ідзе пра пакаранне, вынесенае апазіцыянеру ў маі 2010 года за вывешванне бел-чырвона-белага сцяга на галоўнай навагодняй ёлцы Віцебска, — тры гады пазбаўлення волі ўмоўна.

10 красавіка судовая калегія Віцебскага абласнога суда прыняла рашэнне аб накіраванні Каваленкі на комплексную псіхіятрычную экспертызу ва ўмовах стацыянара. Да атрымання вынікаў экспертызы абласны суд прыпыніў разгляд касацыйнай скаргі Каваленкі на прыгавор.

belapan.com

Іншыя палітычныя вязьні

  • Анатоль Букас
  • Андрэй Жукавец
  • Сяргей Скрабец
  • Андрэй Рамашэўскі
  • Фёдар Мірзаянаў