Заява ПЦ “Вясна” аб умовах дыялогу з уладамі Беларусі

Пры наяўнасці палітвязняў дыялог немагчымы. Без трансфармацыі палітычнай сістэмы застаецца вялікай пагроза новых палітычных закладнікаў.

На педагагічнай нарадзе ў Мінску 29 жніўня 2011 года А. Лукашэнка заявіў пра гатоўнасць правядзення шырокага круглага стала пры ўдзеле прадстаўнікоў ЕС і Расіі з усімі суб’ектамі, “да якога б палітычнага лагеру яны не належалі”.

У сувязі з распачатай дыскусіяй, датычнай умоваў, фармату, удзельнікаў такога перамоўнага працэсу і патрабаванняў, якія могуць быць вынесены на ягоную павестку дня, Праваабрончы цэнтр “Вясна” публічна выказвае сваю пазіцыю.

У 2008 годзе адбыліся падзеі, аналагічныя сённяшняй сітуацыі: вызваленне палітвязняў з’яўлялася ўмовай правядзення дыялогу паміж беларускімі ўладамі і Еўрапейскім Саюзам. За лічаныя дні палітычныя зняволеныя былі вызвалены з турмаў. Цэлых два месяцы за кратамі не знаходзіліся асобы, асуджаныя па палітычных матывах (10 чалавек у гэты ж час адбывалі пакаранні, звязаныя з абмежаваннем волі). Умова адносна мараторыю на палітвязняў была выканана толькі на такі кароткі тэрмін.

На працягу наступных гадоў у Беларусі не было ніводнага дня, каб за кратамі не знаходзіліся палітычныя апаненты.

Кульмінацыяй рэпрэсіяў сталі падзеі 19 снежня 2010 года, калі за ўдзел у мірнай акцыі пратэсту было арыштавана больш за 700 чалавек, абвінавачанне ў арганізацыі і ўдзеле ў “масавых беспарадках” ці “арганізацыі групавых дзеянняў, груба парушаючых грамадскі парадак” было прад’яўлена 43 асобам, сярод якіх – шэсць кандыдатаў у Прэзідэнты, 13 асобаў з’яўляліся падазраванымі, з якіх – яшчэ адзін кандыдат у Прэзідэнты. У дачыненні да большасці ўзятых пад варту парушаліся асноўныя працэсуальныя правы, а менавіта права на абарону, некаторыя з абвінавачаных заявілі, што ў дачыненні да іх выкарыстоўваліся катаванні.

Арганізаванаму ціску з боку ўладаў падвяргаліся адвакаты, якія ажыцяўлялі абарону абвінавачаных па дадзеных палітычна матываваных справах, вынікам чаго стала пазбаўленне адвакацкіх ліцэнзіяў і выключэнне з калегіяў цэлага шэрагу вядомых адвакатаў краіны.

На сённяшні дзень у турмах Беларусі знаходзяцца 20 палітычных зняволеных, сярод якіх тры кандыдаты ў прэзідэнты – Андрэй Саннікаў, Мікалай Статкевіч і Дзмітрый Ус, а таксама кіраўнік Праваабарончага цэнтра “Вясна” Алесь Бяляцкі; 11 чалавек адбываюць крымінальныя пакаранні, не звязаныя з пазбаўленнем волі, з якіх двое кандыдатаў у прэзідэнты – Уладзімір Някляеў і Віталь Рымашэўскі.

На працягу апошніх тыдняў былі памілаваны і адпушчаны на волю 13 фігурантаў крымінальнай справы і спынены пераслед яшчэ ў адносінах да 5 абвінавачаных. У гэты ж час пачалося абмеркаванне магчымасці правядзення дыялогу.

Праваабарончы цэнтр “Вясна” лічыць, што пачынаць перамовы немагчыма без неадкладнага і безумоўнага вызвалення і поўнай рэабілітацыі ўсіх палітзняволеных, у тым ліку — прыгавароных да пазбаўленна волі ўмоўна ці з адтэрміноўкай выканання прысуду, а таксама аднаўлення на працы рэпрэсаваных адвакатаў. Праваабарончы цэнтр “Вясна” лічыць дадзеныя патрабаванні не ўмовай дыялога, а ўмовай для пачатку дыялога, без выканання якой ён проста немагчымы.

Мы настойваем, каб умовамі магчымага дыялогу былі пытанні сістэмных зменаў, якія б зрабілі немагчымым з’яўленне новых палітычных закладнікаў, а менавіта: дасягненне дамоўленасці аб правядзенні шэрагу сістэмных і неабходных рэформаў у галіне асноўных грамадзянскіх правоў і свабод: свабоды мірных сходаў, асацыяцый, свабоды слова і выказвання меркаванняў, выбарчага заканадаўства. Перамоўны працэс павінен мець на мэце канкрэтныя вынікі ў галіне дэмакратызацыі краіны і правядзенні свабодных выбараў, у тым ліку Прэзідэнта Рэспублікі Беларусь.

Адсутнасць ва ўладаў палітычнай волі да правядзення рэальнага перамоўнага працэсу, скіраванага на дэмакратызацыю краіны, будзе азначаць аб чарговых палітычных гульнях рэжыму А. Лукашэнкі. У такім выпадку Праваабарончы цэнтр “Вясна” заклікае ўсе суб’екты палітычный апазіцыі і грамадзянскай супольнасці да няўдзелу ў чарговых імітацыях перамоваў.

Толькі рэальныя крокі, скіраваныя на дэмакратызацыю краіны і правядзенне свабодных выбараў, з’яўляюцца падцверджаннем сістэмных, незваротных зменаў, гарантыяй таго, што ў краіне зноўку не з’явяцца чарговыя палітычныя вязні.

Праваабарончы цэнтр “Вясна”

Заява

Мінск, 8 верасня 2011 г.

spring96.org

, , - у навінах

 

Зьвязаныя навіны:

04.10.2017 Алесь Бяляцкі: “Справа прафсаюзаў” не паспрыяе паляпшэнню палітычных і эканамічных стасункаў з Захадам

23.09.2017 Мікола Статкевіч: Найперш за краты кідаюць патрыётаў сваёй краіны

06.07.2017 Алесь Бяляцкі: Спадзяёмся, што наш голас будзе пачуты

23.05.2017 “Цалкам рэальна, што некаторых фігурантаў “справы патрыётаў” могуць асудзіць…”

24.02.2017 Мікалай Статкевіч: Ёсць чырвоная рыса, за якую не можам перайсці ні мы, ні ўлада

30.01.2017 Мікалай Статкевіч: Сёння ўлады не могуць сабе дазволіць раскідаць усіх па турмах…

06.09.2016 Былыя палітвязні рыхтуюцца да акцыі “Вярні выбары”

23.08.2016 Былы палітвязень Мікалай Статкевіч на гадавіну свайго вызвалення адкаркаваў армянскі каньяк 1968 году

12.08.2016 Мікалай Статкевіч: Найлепшы падарунак для мяне – свабода для нашай краіны

06.07.2016 Мікалай Статкевіч: Гэта ў пэўнай ступені акцыя салідарнасці з былымі палітвязнямі!

Іншыя палітычныя вязьні