У Літве могуць даць Прэмію Свабоды Алесю Бяляцкаму

У Літве абмяркоўваецца магчымасьць прысудзіць зьняволенаму беларускаму праваабаронцу Алесю Бяляцкаму Прэмію Свабоды.

З такой прапановай да камісіі па прэміі выступіў Фонд падтрымкі грамадзянскай абароны і Таварыства беларускай культуры ў Літве. Пра гэта паведамляюць літоўскія сродкі масавай інфармацыі.

«Бясстрашная і пасьлядоўная пазыцыя Алеся Бяляцкага ў справе абароны правоў чалавека ў Беларусі шмат разоў ацэньвалася ў сьвеце шляхам уручэньня яму розных узнагарод», — адзначаюць згаданыя арганізацыі.

Таксама акцэнтуецца, што беларуская праваабарончая арганізацыя «Вясна», якую Бяляцкі ўзначальвае з 1996 года, зьяўляецца адной з асноўных арганізацый па абароне правоў чалавека ў Беларусі, якая аказвае прававую і іншую дапамогу асобам, якія пацярпелі ад палітычных рэпрэсій, а таксама іх сем’ям.

У прыкладзеным апісаньні дзейнасьці Бяляцкага гаворыцца, што з 1988 года ён больш за 20 разоў быў затрыманы з-за сваёй палітычнай і грамадзянскай дзейнасьці.

Прэміяй Свабоды ўзнагароджваюць з мэтай ацаніць унёсак асоб і арганізацый у абарону правоў чалавека, разьвіцьцё дэмакратыі, заахвочваньне міждзяржаўнага супрацоўніцтва ў барацьбе за свабоду самавызначэньня і сувэрэнітэт народаў Усходняй і Цэнтральнай Эўропы.

Гэтую прэмію літоўскі парлямэнт заснаваў 15 верасьня 2011года, яна складае 5 тысяч эўра.

Першая Прэмія Свабоды была прысуджана актыўнаму змагару за свабоду і дэмакратыю, абаронцу правоў чалавека, расейскаму дысыдэнту Сяргею Кавалёву. Прэмія 2012 года дасталася былому дысыдэнту савецкага рэжыму, кіраўніку літоўскай Лігі свабоды Антанасу Тярляцкасу.

Прэмія ўручаецца штогод 13 студзеня — у літоўскі Дзень абаронцаў свабоды. Пастановай парлямэнта яна прысуджаецца да 23 сьнежня.

Справа Бяляцкага

Кіраўнік праваабарончага цэнтру «Вясна» Алесь Бяляцкі асуджаны на 4,5 года турмы ў лістападзе летась. Яго прызналі вінаватым у нясплаце падаткаў. Праваабаронца сваёй віны не прызнаў і заявіў, што ўсе грошы, атрыманыя на ягоныя рахункі, ішлі на праваабарончую дзейнасьць.

Падставай для крымінальнага перасьледу Бяляцкага стала інфармацыя пра банкаўскія рахункі, якую перадалі афіцыйнаму Менску Літва і Польшча.

Краіны Эўразьвязу, ЗША і міжнародныя праваабарончыя арганізацыі лічаць Бяляцкага палітвязьнем, а прысуд яму — палітычна матываваным. Яны патрабуюць ад уладаў Беларусі вызваліць праваабаронцу.

svaboda.org

- у навінах

 

Зьвязаныя навіны:

09.09.2020 “На гвалт і катаванні быў загад”. Кіраўнік Праваабарончага цэнтра “Вясна” Алесь Бяляцкі прааналізаваў месяц, які пражыла краіна пасля выбараў

05.08.2020 “Усё гэта мне нагадвае нейкае дэжавю…” Дзевяць гадоў таму быў арыштаваны кіраўнік Праваабарончага цэнтра “Вясна” Алесь Бяляцкі

03.06.2020 Алесь Бяляцкі: Улады паказваюць, што не збіраюцца гуляць па правілах

07.05.2020 Алесь Бяляцкі: У Беларусі асноўны удар накіраваны на блогераў

09.04.2019 Алесь Бяляцкі: Пераслед незалежных СМІ у гэтым годзе толькі ўзмацніўся

21.03.2019 Алесь Бяляцкі: Няма ніякага сумневу, што справа Аюба Ціціева – палітычная

31.05.2018 Алесь Бяляцкі: Перакананы, што лідараў незалежнага прафсаюза не пасадзяць

30.03.2018 Алесь Бяляцкі: Рэпрэсіўныя механізмы працягваюць працаваць

22.03.2018 Алесь Бяляцкі: Улады зрабілі больш жорсткай тактыку рэпрэсій

28.12.2017 Алесь Бяляцкі: Гэта быў няпросты і досыць трывожны год

Іншыя палітычныя вязьні