Мікалая Аўтуховіча трымаюць у сырой камеры ў падвале

Акрамя таго, палітвязень у турме амаль не размаўляе.

«У канцы верасня ад мужа прыйшоў ліст. У яго баявы дух. Я настройваю яго, што прыйдзецца сядзець да канца», – распавяла сайту charter97.org Алена Аўтуховіч, жонка палітвязня Мікалая Аўтуховіча.

Па словах жонкі палітвязня, Мікалай Аўтуховіч у турме амаль не размаўляе. «Ён напісаў, што размаўляе ў суткі максімум 15 хвілін. Але не патлумачыў, чаму».

Палітвязня ўтрымліваюць у сырой камеры ў паўпадвальным памяшканні, адзначыла яго жонка. «Мікалая ўтрымліваюць у турме строгага рэжыму. Двойчы ў год яму дазволена кароткатэрміновае спатканне па дзве гадзіны – праз шкло. Раз у дзень гадзінныя прагулкі. Раз у год я магу паслаць яму перадачу на 30 кілаграм. Турма, у якой сядзіць мой муж, старая. Камера знаходзіцца ў паўпадвальным памяшканні. Сцены заўсёды вільготныя, сырыя. Там холадна нават летам, ні тое што ўзімку».

Мікалаю Аўтуховічу не перадаюць пэўныя рэчы, адзначыла Алена Аўтуховіч. «Хоць з перадачамі бывае праблемна. Хацела яму, напрыклад, сродак для барацьбы з прусамі пераслаць. Але не прынялі. Мне ў турме так і сказалі – калі б не прозвішча Аўтуховіч, перадалі б. А так усе баяцца».

Знаёмыя падтрымліваюць сям’ю Аўтуховічаў, падкрэсліла жонка палітвязня. «У мяне амаль кожны дзень пытаюцца, ці хутка Мікалай выйдзе, як ён там. Усе людзі, якія яго ведаюць, кажуць пра яго толькі добрае».

Нагадаем, прадпрымальнік з Ваўкавыска Мікалай Аўтуховіч быў асуджаны на 5 гадоў і 2 месяцы пазбаўлення волі па абвінавачванні ў незаконным звароце са зброяй. Ён сваёй віны ў судзе не прызнаў і заявіў, што яго пераследуюць за антыкарупцыйную дзейнасць.

Іншыя палітычныя вязьні