Еўрадэпутат Яцэк Сарыюш-Вольскі выступіў з ініцыятывай узнагародзіць зняволенага старшыню Праваабарончага цэнтра “Вясна”, палітвязня Алеся Бяляцкага да найбольш прэстыжнай узнагароды Еўрапейскага Парламента – прэміі Сахарова. Да вылучэння на прэмію патрэбна сабраць каля 40 подпісаў еўрапейскіх дэпутатаў. “Хачу сабраць подпісы з розных палітычных фракцыяў, бо справа Алеся Бяляцкага вышэй за палітычныя падзелы,” – кажа еўрадэпутат Яцэк Сарыюш-Вольскі:

– Як толькі будуць вылучаны кандыдатуры, трэба сабраць подпісы ў Еўрапейскім парламенце. Я хачу, каб гэта была асоба, вышэйшая за палітычныя справы. Я буду збіраць подпісы, каб Алесь Бяляцкі стаў лаўрэатам узнагароды Сахарава, бо ён, як ніхто іншы, адпавядае крэтэрыям такой узнагароды: гэта барацьба, вольнасць, правы чалавека, мужнасць.

Прэмія імя Андрэя Сахарава “За свабоду думкі”, названая ў гонар савецкага навукоўца і дысыдэнта Андрэя Сахарава, была заснавана ў снежні 1985 года Еўрапейскім Парламентам і прысуджаецца асобам ці арганізацыям, якія абараняюць правы і свабоды людзей.

Звычайна прэмія ўручаецца каля 10 снежня, у дзень, калі ААН была падпісаная Усеагульная дэкларацыя правоў чалавека. З Беларусі прэміяй Сахарава быў уганараваны лідар Руху “За Свабоду” Аляксандр Мілінкевіч і Беларуская Асацыяцыя Журналістаў.

racyja.eu