
Маці і брат Эдуарда Лобава, намесніка старшыні Маладога Фронту, наведалі яго ў калоніі №22 “Воўчыя Норы”, каля пасёлка Даманава Івацэвіцкага раёну.
Сустрэча працягвалася 3 сутак, – распавяла маці палітвязня Марына Лобава. Яна і брат павіншавалі Эдуарда з днём нараджэння:
– Нармальна сябе адчувае, здаровы, усё ў парадку ў яго. Прасіў падзякваць усіх, хто павіншаваў яго з днём нараджэння, даслаў паштоўкі. 1 снежня яму споўнілася 25 гадоў. На гэты момант ён вучыцца – вось ужо чатыры месяцы вучыцца на электрасваршчыка. Затым, пасля выхады з калоніі, хоча яшчэ атрымаць вышэйшую адукацыю, хоча паступіць на гістарычны факультэт.
Эдуард Лобаў быў арыштаваны разам з кіраўніком Маладога Фронту Змітром Дашкевічам 18 снежня 2010 года. Па сфабрыканванай спецслужбамі справе аб хуліганстве яны былі асуджаныя да зняволення. Дашкевіч на 2 гады, а Лобаў – на 4 гады калоніі ўзмоцненага рэжыму.
“Такім чынам, праз некалькі дзён споўніцца 3 гады, як Эдуард за кратамі. І год застаецца да яго вызвалення,” – нагадала маці палітзняволенага.
racyja.com