З прашэннем аб памілаванні на імя Лукашэнкі звярнуліся яшчэ двое палітзняволеных

Месяц таму на імя прэзідэнта паступілі хадайніцтвы аб памілаванні ад двух асуджаных. Пра гэта паведаміў Аляксандр Лукашэнка 23 верасня, адказваючы на пытанне БелаПАН аб тым, ці не паступалі ў апошні час на яго імя прашэнні аб памілаванні ад асуджаных за падзеі 19 снежня 2010 года.

“Не ведаю, ці звярталіся. Калі так, то звароты знаходзяцца ў камісіі па памілаванні. Мы вас абавязкова праінфармуем. Месяц таму мне казалі, што двое звярталіся”, – сказаў Лукашэнка. На ўдакладняльнае пытанне, хто менавіта звярнуўся да яго па памілаванне, кіраўнік дзяржавы адказаў, што не ведае. “Удакладнім – скажам”, – дадаў ён.

У прэс-службе прэзідэнта БелаПАН удакладнілі, што з прашэннем аб памілаванні на імя кіраўніка дзяржавы звярнуліся Сяргей Каваленка і Павел Сырамолатаў.

Варта, аднак, адзначыць, што гэтыя асуджаныя не з’яўляліся фігурантамі справы аб падзеях 19 снежня 2010 года ў Мінску. Сяргей Каваленка асуджаны па абвінавачанні ва ўхіленні ад адбывання пакарання ў выглядзе абмежавання волі. Размова ідзе пра пакаранне, якое было вынесена апазіцыянеру ў маі 2010 года за вывешванне бел-чырвона-белага сцяга на галоўнай навагодняй ёлцы Віцебска. Павел Сырамолатаў — адзін з анархістаў, асуджаных за спробу падпалу будынка КДБ у Бабруйску.

Іншыя палітычныя вязьні