Мікалай Статкевіч папярэджвае пра новыя правакацыі

Турэмнае начальства прадпрымае новыя спробы выбіць прашэнне аб памілаванні ад палітвязня.

Пра гэта сайту charter97.org паведаміла яго жонка Марына Адамовіч.

«Зноў пачалася нейкая мітусня. Адчуванне, што шукаюць «спосабы». Успомніў, што ў Шклове, калі пачаўся ціск, мне пагражалі напісаць прашэнне аб памілаванні замест мяне, ды так, што «ніякая экспертыза не пакажа». Каб зберагчы ад спакусы, папярэджваю – у выпадку падробкі «пракаментую» так, што мала не падасца. Я ўмею», – адзначыў Мікалай Статкевіч у сваім лісце.

У сваю чаргу жонка палітычнага вязня падкрэсліла, што падобныя правакацыі ў шклоўскай калоніі пачаліся яшчэ ў ліпені-жніўні 2011 года.

«У горад прыехаў Лукашэнка і заявіў, што прадаставіць палітвязням цягнік і самалёт, толькі б яны напісалі прашэнне аб памілаванні і з’ехалі з краіны. Калі хлопцы, якія там сядзелі, адмовіліся пісаць прашэнне, то на іх пачаўся «пробны» ціск. Ім пагражалі, што за іх усё напішуць «майстры» і зробяць гэта так, што ніякая графалагічная экспертыза гэтага не вызначыць. Мне пра гэта распавядалі практычна ўсе, з кім я размаўляла пасля вызвалення», – паведаміла Марына Адамовіч.

Яна адзначыла, што на гэты раз мітусня пачалася ўжо вакол магілёўскай турмы.

«Мікалай лічыць, што чыноўнікі шукаюць выйсце з сітуацыі. Раней муж нават заявіў, каб да яго не звярталіся з такой прапановай. Зараз Мікалай прыгадаў падзеі двухгадовай даўніны і вырашыў папярэдзіць, што ён у курсе і гэтага не дапусціць», – упэўненая Марына Адамовіч.

Нагадаем, Мікалай Статкевіч быў адным з кандыдатаў у прэзідэнты на выбарах 2010 года. Арыштаваны пасля масавай дэманстрацыі пратэсту супраць іх фальсіфікацый.

26 траўня 2011 года палітык быў прысуджаны судом Партызанскага раёна Менска да 6 гадоў пазбаўлення волі ва ўмовах узмоцненага рэжыму.

Рашэннем суда ад 12 студзеня 2012 года ўмовы адбыцця пакарання былі змененыя на больш жорсткія, і ён быў пераведзены з калоніі № 17 у Шклове ў турму № 4 Магілёва.

Статкевіча часта кідаюць у карцэр, палітвязень абмежаваны ў перадачах і сустрэчах са сваякамі, па загадзе ўладаў у дачыненні да яго ажыццяўляюцца правакацыі.

- у навінах

 

Іншыя палітычныя вязьні