Лідары прафсаюза РЭП Ігар Комлік і Генадзь Фядыніч распавялі сайту palitviazni.info пра тое, ці ёсць у іх шанцы на больш хуткае вызваленне.
Нагадаем, што 24 жніўня 2018 г. суд Савецкага раёна Мінска асудзіў кіраўнікоў прафсаюза РЭП Ігара Комліка і Генадзя Фядыніча на 4 гады абмежавання волі без накіравання ў установы адкрытага тыпу з забаронай займаць кіруючыя пасады тэрмінам на 5 год.
Іх асудзілі па ч. 2 арт. 243 Крымінальнага кодэкса Рэспублікі Беларусь (ухіленне ад выплаты падаткаў у буйным памеры).
Праваабаронцы прызналі гэтую справу палітычна матываванай.
Ігар Комлік пачаў адбываць “дамашнюю хімію” з 19 снежня 2018 году, Генадзь Фядыніч – са студзеня 2019 году.
У лістападзе мінулага году стала вядома, што Фядыніч і Комлік патрапілі пад дзеянне закона аб амністыі, прынятага да 79-годдзя вызвалення Беларусі ад нямецка-фашысцкіх захопнікаў. Тэрмін адбыцця пакарання ім скарацілі на год.
“22 мая гэтага году пачаў дзейнічаць Закон аб амністыі, але я не ведаю, ці трапляю пад дзеянне гэтага закона,– кажа Ігар Комлік. – Парушэнняў у мяне няма, я нават не выключаў умоўна-датэрміновае вызваленне.
Па маіх падліках, ужо ў жніўні з мяне могуць зняць пакаранне”.
Генадзь Фядыніч у гэтым плане больш песімістычны.
“У мяне значна горшыя перспектывы па вызваленні, – кажа Генадзь Фёдаравіч. – Па-першае, тэрмін адбыцця пакарання ў мяне пачаўся пазней. Па–другое, да маёй асобы, відаць, крыху іншае стаўленне.
Напрыклад, Ігару Комліку дазваляюць два разы на месяц з’ездзіць на лецішча і правесці там ноч. Мне дазволілі толькі адзін раз – у мінулыя выходныя. Звярнуўся ў інспекцыю, якая сочыць за выкананнем пакарання, каб паехаць за горад і ў гэтыя выходныя, але мне адмовілі.
Кажу: “З Ігарам Комлікам мы асуджаны па адным артыкуле, але законы ў Цэнтральным і Фрунзенскім РУУС розныя?» Нават і не ведалі, што адказаць. Сказалі толькі: “Будзем узгадняць”.
Калі не адпусцяць, то буду звяртацца ў вышэйшыя інстанцыі. Трэба іх напружваць, бо гэта проста беззаконне”.
palitviazni.info