Ці пагражае прэвентыўны нагляд Мікалаю Статкевічу?

DSCN5795На гэтым тыдні ў мінскім Цэнтральным раённым судзе пачаліся працэсы над удзельнікамі мітынгу 22 лютага ў падтрымку індывідуальных прадпрымальнікаў.

Былы палітвязень Мікалай Статкевіч на працэс не прыйшоў, а справу старшыні АГП Анатоля Лябедзькі паводле ягонай заявы адклалі на 14 сакавіка.

Нагадаем, што сам спадар Статкевіч заявіў, што ён прынцыпова не ходзіць на такія суды і плаціць штрафы не збіраецца.

Што ў такім выпадку пагражае Мікалаю Статкевічу? Пра гэта сайту palitviazni.info распавядае намеснік старшыні праваабарончага цэнтру «Вясна» Валянцін Стэфановіч.

“Калі Мікалай Статкевіч і надалей не будзе плаціць штрафы, то будзе накладзена спагнанне альбо на яго маёмасць, альбо (калі няма маёмасці)на іншыя крыніцы прыбытку, – кажа праваабаронца. – Магчыма, будуць вылічаць грошы з пенсіі. Па законе – у месяц не больш за 20 працэнтаў. І таксама гэта можа пагражаць абмежаваннем права на выезд”.

Зараз былы палітзняволены знаходзіцца пад прафілактычным наглядам. Ці могуць яму ў такім выпадку прафілактычны нагляд змяніць на прэвентыўны?

“З аднаго боку няма дастатковых падстаў, каб быў уведзены прэвентыўны нагляд, – адзначае Валянцін Стэфановіч.А з іншага – гэта тэарэтычна магчыма, бо Статкевіч прыцягваўся да адказнасці за парушэнне парадку правядзення арганізацыі і ўдзелу ў несанкцыянаваных масавых мерапрыемствах. Але, мяркую, улады наўрад ці зараз пойдуць на такі крок. Мне падаецца, што яны не зацікаўлены ў нейкіх рэпрэсіўных больш жорсткіх захадах, і гэта бачна па апошніх акцыях. Ужо фактычна са жніўня мінулага году ў сталіцы праходзяць мерапрыемствы, якія ладзяць палітычныя апаненты ўлады, але на “суткі” нікога не адпраўляюць, а абмяжоўваюцца штрафамі”.

Не так даўно міністр унутраных спраў Ігар Шуневіч заявіў, што МУС змяніла сваё стаўленне да несанкцыянаваных масавых акцый і знайшло “цывілізаваны з пункта гледжання міжнародных патрабаванняў алгарытм дзеянняў”. Зараз міліцыя не ладзіць “хапуны”, а складае адміністратыўныя пратаколы.

“Трэба змяняць не падыходы, а заканадаўства, – дадае праваабаронца. – Каб права грамадзян на свабоду мірных сходаў магло рэалізоўвацца не шляхам несанкцыянаваных мерапрыемстваў, за якія людзей штрафуюць. Значыцца, надыйшоў час, каб змянялася не толькі практыка, але і законы. Таму што заканадаўства, як і раней, засталося вельмі абмежавальным у частцы рэалізацыі свабоды мірных сходаў. Правесці такую акцыю ў адпаведнасці з законам здараецца часам проста немагчыма. Так, мы адзначаем, што ў апошні час няма нават адміністратыўных арыштаў. Сёння ўзровень рэпрэсій, калі яго ацэньваць з пункту гледжання колькасных паказнікаў, відавочна знізіўся. Няма новых узбуджаных палітычна матываваных спраў, мы бачым гэтыя станоўчыя тэндэнцыі. Але адсутнасць сістэмных зменаў на ўзроўні заканадаўства робіць усе гэтыя практыкі вельмі няўстойлівымі. У любы момант улады могуць вярнуцца да рэпрэсіўных падыходаў, як толькі актыўнасць палітычных партый і грамадскіх арганізацый узрасце, бо гэта можа успрымацца, як пагроза для існуючага рэжыма. Таму мы і кажам пра неабходнасць правядзення рэформаў на ўзроўні заканадаўства ў той сферы, якая рэгулюе рэалізацыю грамадзянскіх і палітычных правоў”.

palitviazni.info

- у навінах

 

Зьвязаныя навіны:

13.11.2017 Мікалай Статкевіч: Справа можа дайсці нават да пасадкі ў турму

24.10.2017 Сяргей Скрабец: Сэнсу ў акцыях не бачу, але ў душы пратэстоўцаў падтрымліваю

23.09.2017 Мікола Статкевіч: Найперш за краты кідаюць патрыётаў сваёй краіны

23.05.2017 “Цалкам рэальна, што некаторых фігурантаў “справы патрыётаў” могуць асудзіць…”

24.02.2017 Мікалай Статкевіч: Ёсць чырвоная рыса, за якую не можам перайсці ні мы, ні ўлада

30.01.2017 Мікалай Статкевіч: Сёння ўлады не могуць сабе дазволіць раскідаць усіх па турмах…

06.09.2016 Былыя палітвязні рыхтуюцца да акцыі “Вярні выбары”

23.08.2016 Былы палітвязень Мікалай Статкевіч на гадавіну свайго вызвалення адкаркаваў армянскі каньяк 1968 году

12.08.2016 Мікалай Статкевіч: Найлепшы падарунак для мяне – свабода для нашай краіны

06.07.2016 Мікалай Статкевіч: Гэта ў пэўнай ступені акцыя салідарнасці з былымі палітвязнямі!

Іншыя палітычныя вязьні