Алесь Міхалевіч рыхтуецца да парламенцкай кампаніі

indexЭкс-кандыдат у прэзідэнты Алесь Міхалевіч, які быў вымушаны пакінуць Беларусь пасля прэзідэнцкай кампаніі 2010 году (тады ён з шэрагам іншых кандыдатаў на вышэйшую пасаду ў краіне апынуўся пад крымінальным пераследам), зараз рыхтуецца балатавацца ў дэпутаты Палаты прадстаўнікоў Нацыянальнага сходу.

“У той жа час хачу нагадаць, што мая крымінальная справа не зачыненая, а прыпыненая”, – распавёў сайту palitviazni.info палітык.

Нагадаем, экс-кандыдат у прэзідэнты Алесь Міхалевіч быў вымушаны пакінуць Беларусь пасля прэзідэнцкай кампаніі 2010 году. Тады ён з шэрагам іншых кандыдатаў на вышэйшую пасаду ў краіне апынуўся пад крымінальным пераследам. Міхалевіч стаў адным з фігурантаў нашумелай справы “Аб масавых беспарадках”. Пэўны час палітык знаходзіўся ў СІЗА КДБ і быў першым з тых, хто заявіў пра жорсткія катаванні ў турэмных засценках.

Выйшаўшы на волю пад падпіску аб нявыездзе, Міхалевічу ўсё ж-такі ўдалося пакінуць Беларусь і эмігрыраваць у Чэхію. Але ў мінулым годзе палітык вярнуўся на радзіму пасля пяці гадоў жыцця за яе межамі.

“Мая крымінальная справа па-ранейшаму прыпыненая, – кажа Алесь Міхалевіч. – Мяне не выклікаюць да следчых, нічога не пытаюць, бо і не павінны гэтага рабіць. Справа ж прыпыненая, а значыць вытворчасць не вядзецца. Пакуль яе не адновяць, нічога рабіць не будуць. Але справу і не закрываюць, бо тады следчыя вымушаны будуць прызнаць мяне невінаватым, хаця я правёў некалькі месяцаў у турме. Тады ўзнікне пытанне: “Калі не вінаваты, то тады на якой падставе знаходзіўся за кратамі?”  Па міжнароднай лініі я стараюся нейкім чынам паўплываць на сітуацыю, але не больш за тое”.

Па словах палітыка, зараз ён займаецца падрыхтоўкай да свайго ўдзелу ў парламенцкай кампаніі.

“Фактычна кампанія ўжо ў чэрвені стартуе, але асноўная частка агітацыі будзе ў жніўні, – працягвае ён. – Каманда ў мяне цалкам яшчэ не сфармавана, хаця ў цэлым план ужо ёсць. Колькі сілаў ёсць, столькі і кіну на барацьбу. Але ўжо сёння я не сумняюся, што за мяне людзі прагаласуюць. Гэта акруга, дзе я раней балатаваўся, там заўсёды была падтрымка”.

palitviazni.info  

Іншыя палітычныя вязьні