Віганд: Вызваленне і рэабілітацыя палітвязняў застаюцца абавязковай умовай нармалізацыі адносін ЕС і Беларусі

Вызваленне і рэабілітацыя палітзняволеных па-ранейшаму застаюцца «неабходнай і абавязковай умовай для нармалізацыі адносін Еўрасаюза і Беларусі і рэалізацыі іх поўнага патэнцыялу».

Пра гэта заявіў кіраўнік дэпартамента Расіі, Усходняга партнёрства, Цэнтральнай Азіі, рэгіянальнага супрацоўніцтва і АБСЕ Еўрапейскай службы замежных дзеянняў Гунар Віганд 24 верасня на сустрэчы з журналістамі ў Мінску, паведамляе БелаПАН.

Еўрачыноўнік знаходзіцца з рабочым візітам у Беларусі 24–25 верасня. Ён паведаміў, што ўжо правёў сустрэчу з намеснікам кіраўніка МЗС Аленай Купчыной.

Вечарам 24 верасня ў яго запланаваны сустрэчы з прадстаўнікамі грамадзянскай супольнасці і апазіцыі, а 25 верасня — з кіраўнікамі місій краін ЕС, акрэдытаваных у Беларусі.

Паводле слоў Віганда, сустрэча з Купчыной была «канструктыўнай і плённай». «Яе галоўнай мэтай было абмеркаваць, у якой меры ўрад можа паўдзельнічаць у «Дыялогу аб мадэрнізацыі Беларусі». Але, вядома, я зноў паўтарыў пазіцыю ЕС, што для нармалізацыі адносін неабходна вызваленне палітзняволеных», — сказаў ён.

Адказваючы на пытанне БелаПАН, ці змянілася пазіцыя афіцыйнага Мінска, які раней катэгарычна адмаўляўся ўдзельнічаць у праграме «Еўрапейскі дыялог аб мадэрнізацыі Беларусі», Віганд сказаў: «Мы канструктыўна працуем у гэтым кірунку, разумеем, наколькі гэта далікатныя пытанні».

Еўрачыноўнік адзначыў, што яго візіт з’яўляецца часткай спробаў Еўрасаюза «стаць бліжэй да Беларусі ў межах Усходняга партнёрства», саміт якога запланаваны на канец лістапада ў Вільні.

Пры гэтым Віганд падкрэсліў, што ў двухбаковых адносінах з Беларуссю ў межах Усходняга партнёрства ЕС прасунуўся не так далёка, як з астатнімі краінамі-ўдзельніцамі — Арменіяй, Азербайджанам, Грузіяй, Малдовай, Украінай.

У той жа час, на думку Віганда, двухбаковыя адносіны паміж Беларуссю і ЕС «паступова наладжваюцца».

Віганд сказаў, што па меры далейшага прасоўвання перамоўнага працэсу з Беларуссю ў межах «Дыялогу аб мадэрнізацыі» Еўрасаюз таксама хацеў бы дасягнуць поспеху і па пытанні заключэння пагадненняў аб аблягчэнні візавага рэжыму і аб рэадмісіі, аднак станоўчага адказу ад беларускіх улад пакуль не было.

Пры гэтым еўрачыноўнік падкрэсліў, што на саміце ў Вільнюсе пагадненні аб аблягчэнні візавага рэжыму з ЕС і аб рэадмісіі плануецца падпісаць з Азербайджанам, а з Арменіяй яны неўзабаве павінны набыць моц.

«Так што Беларусь не адзіная краіна Усходняга партнёрства, з якой у ЕС не дзейнічаюць такія пагадненні», — заўважыў Віганд.

На пытанне журналістаў, ці не прывёз прадстаўнік Еўрасаюза запрашэнне Беларусі на ўдзел у віленскім саміце, Віганд адказаў адмоўна: «Чакаем, што Беларусь будзе ўдзельнічаць у саміце і атрымае запрашэнне на яго ў такім жа фармаце, як і іншыя краіны-партнёркі. Але не магу сказаць, на якім узроўні гэта будзе зроблена».

belapan.by

 

Зьвязаныя навіны:

Іншыя палітычныя вязьні