Палітвязень Максім Знак, які быў адвакатам і даверанай асобай Віктара Бабарыка і Марыі Калеснікавай, застаецца пад вартай да 9 сакавіка.
“Дзякуй усім за падтрымку, – перадае Максім на волю. – Не падайце духам!”
Як вядома, днямі суд Партызанскага раёна адмовіў у скарзе абароны Максіма Знака на падаўжэнне тэрміну зняволення да 9 сакавіка.
“Як юрыст Максім спадзяецца, што прававыя працэдуры пачнуць некалі працаваць і даваць людзям абарону, – кажа адвакат Зміцер Лаеўскі. – Максім – мужны чалавек і перадае ўсім – не падаць духам. Максім адчувае падтрымку, бачыць яе ў лістах, ведае, што мноства людзей думае пра яго”.
Абарона будзе абскарджваць рашэнне Партызанскага суда ў Мінскім гарадскім судзе і працягне барацьбу за Максіма.
***
Падчас выбарчай кампаніі Максім Знак быў адвакатам і даверанай асобай Віктара Бабарыка і Марыі Калеснікавай.
Быў затрыманы раніцай 9 верасня. У той жа дзень Следчы камітэт афіцыйна паведаміў, што “Галоўным следчым упраўленнем Следчага камітэта працягваецца расследаванне крымінальнай справы, узбуджанай Генеральнай пракуратурай Рэспублікі Беларусь па ч. 3 арт. 361 Крымінальнага кодэкса (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь).
У адносінах да падазраваных Марыі Калеснікавай і Максіма Знака с санкцыі пракурора была абраная мера стрымання ў выглядзе заключэння пад варту.
Праваабарончай супольнасцю Максім Знак прызнаны палітвязнем.
palitviazni.info
