Рашэнне па Саннікаву зацягваецца, бо “правяраюць, ці сапраўды ён пісаў прашэнне”

Доўгі разгляд прашэння аб памілаванні экс-кандыдата ў прэзідэнты Андрэя Саннікава можна растлумачыць неабходнасцю праверкі заяў, якія гучалі ў СМІ, аб тым, што нібыта прашэнне аб памілаванні было напісана палітыкам пад уздзеяннем катаванняў.

Аб гэтым паведаміла парталу Tut.by крыніца, блізкая да кіраўніцтва краіны.

«Для прыняцця рашэння неабходна дакладна пераканацца, што Саннікаў сапраўды напісаў прашэнне па ўласнай волі», — адзначыў ён.

Як паведамлялася раней, у пачатку сакавіка прайшло пасяджэнне камісіі па пытаннях памілавання пры прэзідэнце, на якім было разгледжана прашэнне аднаго з асуджаных за ўчыненне тэракта ў мінскім метро Уладзіслава Кавалёва. Вечарам 14 сакавіка па тэлеканале «Беларусь 1» было аб`яўлена, што Аляксандр Лукашэнка адмовіўся памілаваць Уладзіслава Кавалёва і Дзмітрыя Канавалава, хаця апошні не звяртаўся з такім прашэннем.

Пры гэтым дагэтуль нічога не паведамляецца пра лёс прашэнняў аб памілаванні Андрэя Саннікава і яго даверанай асобы Дзмітрыя Бандарэнкі.

Андрэй Саннікаў быў прыгавораны да пяці гадоў пазбаўлення волі ў калоніі ўзмоцненага рэжыму па абвінавачанні ў арганізацыі масавых беспарадкаў 19 снежня 2010 года. У канцы студзеня стала вядома, што ён напісаў прашэнне аб памілаванні. Паводле слоў жонкі палітыка Ірыны Халіп, яно было напісана яшчэ 20 лістапада 2011 года пад уздзеяннем катаванняў. Аднак у МУС сцвярджаюць, што Саннікаў напісаў прашэнне 23 снежня і 23 студзеня яно было перададзена ў аддзел па пытаннях грамадзянства і памілавання Адміністрацыі прэзідэнта.

Дзмітрый Бандарэнка быў асуджаны на два гады пазбаўлення волі ў калоніі агульнага рэжыму. Адразу пасля арышту ў снежні 2010 года ў яго абвастрыліся хранічныя захворванні, у ліпені яму зрабілі аперацыю на пазваночніку ў 5-й клінічнай бальніцы Мінска. У канцы студзеня гэтага года Бандарэнку ўзмацнілі жорсткасць умоў утрымання ў калоніі, нягледзячы на цяжкі стан здароўя. Асуджанаму, у прыватнасці, забаранілі карыстацца мыліцай, на якую ён абапіраўся пры хадзьбе, насіць мяккі абутак, які яму перадала жонка, абавязалі выходзіць на працу, на паверку на пляц, хадзіць у страі. Пасля таго як 1 лютага Бандарэнка падаў прашэнне аб памілаванні на імя Лукашэнкі, яму дазволілі карыстацца мыліцай.

belapan.com

Іншыя палітычныя вязьні