Палітвязень Вітольд Ашурак, які зараз знаходзіцца ў Гродзенскай турме, пракаментаў свой прысуд і з аптымізмам глядзіць у будучыню.
“Я ўпэўнены, што 2021 год прынясе Беларусі перамены, якіх мы так моцна праглі ў 2020-м”, – кажа Вітольд.
Вітольд Ашурак – актывіст з Бярозаўкі, сябра Партыі БНФ. Каардынатар руху «За свабоду».
Вітольда абвінавацілі па артыкулах 342 ч.1 (Удзел у групавых дзеяннях, груба парушаючых грамадскі парадак) і 364 (Гвалт у дачыненні да супрацоўніка міліцыі) Крымінальнага кодэкса.
Суд прысудзіў Ашурку 5 гадоў калоніі агульнага рэжыму.
“Дзякуй Богу, здароўе пакуль што маю і спадзяюся, што турма не адніме мне яго канчаткова, – напісаў Вітольд Ашурак ў лісце да Касі Панкевіч. – Важны настрой, бо чалавек, які саслабеў духам і не мае цвёрдых маральных перакананняў, нават, калі і мае добрае здароўе, то ў турме часцяком ламаецца і губляе там здароўе, што было. Але, спадзяюся, гэта не пра мяне.
Што тычыцца добрых людзей, то я перакананы – што чалавек шукае, тое ён і знаходзіць. Прынамсі, мне трапляюцца ў сваёй большасці людзі прыстойныя”.
Палітвязень называе сябе чалавекам, які “глядзіць у будучыню з аптымізмам”.
“Таму лічу, што пяць год, якія мне прысудзілі, – гэта проста лічба, – дадае Вітольд Ашурак. – “Я ўпэўнены, што 2021 год прынясе Беларусі перамены, якіх мы так моцна праглі ў 2020-м! Такім чынам, лічбы 5, 50, 500 у маім выпадку – проста лічбы”.
palitviazni.info