Блогер Зміцер Казлоў (“Шэры Кот”) распавёў сайту palitviazni.info пра сваё знаходжанне ў СІЗА, пераслед і будучыя планы.
“У любы момант могуць ізноў кінуць за краты, – кажа Зміцер. – Напэўна, выкарыстаюць нейкі зручны момант, калі патрэбна будзе ізаляваць перад якімі-небудзь святамі ці перад выбарамі…”
Зміцер Казлоў быў затрыманы 25 студзеня, на наступны дзень у судзе Аршанскага раёна яго асудзілі за заклікі да ўдзелу ў акцыі 7 снежня і адправілі адбываць 15-суткавы арышт, адсядзеў 25 сутак, паведамляе spring96.org.
Падчас знаходжання пад вартай яго асудзілі яшчэ пяць разоў, і на кожным судзе ён атрымліваў новыя 15 сутак. Агулам блогер атрымаў 105 сутак арышту.
Беларуская праваабарончая супольнасць выступіла з заявай наконт адміністрацыйнага пераследу Зміцера Казлова. Праваабаронцы выказваюць пратэст з нагоды палітычнага пераследу і арышту блогера і патрабуюць адмены ўсіх вынесеных у дачыненні да Змітра пастаноў. Яны нагадваюць, што ў выпадку працягу арышту блогер будзе лічыцца палітычным зняволеным, як і астатнія арыштаваныя ўдзельнікі мірных акцый.
– Дваццаць пяць сутак у ізалятары часовага ўтрымання – гэта, безумоўна, складана, хаця многія кажуць, што ў параўнанні з Мінскам у Оршы ўмовы ўтрымання больш цывілізаваныя, – кажа Зміцер Казлоў. – Я чытаў, што Паўлу Севярынцы, напрыклад, забаранялі на Акрэсціна паперу і асадкі, а ў нас у гэтым плане ніякіх забаронаў не было.
Што датычыцца харчаванне, то звычайнае для такіх устаноў. Давалі есці, каб не памерлі, але ж зразумела, што не ў рэстаран патрапіў.
– Колькі чалавек было ў камеры?
– Спачатку ўтрох знаходзіліся ў камеры, якая разлічана на чацвярых, затым былі ўдвух. Публіка таксама звычайная – тыя, каго адправілі на суткі за п’янкі, дробныя крадзяжы, нейкія сямейныя скандалы. Людзі ў розныя сітуацыя трапляюць.
– Чым займаліся амаль месяц за кратамі?
– Хадзіў па крузе, чытаў кнігі, быў у роздумах. Калі пачалі лісты прыходзіў, то адказваў.
– З ізалятары вас на суды вас вазілі?
– Ужо праз некалькі дзён, як прывезлі ў ІЧУ, мне прынеслі спачатку два пратаколы, а затым яшчэ тры. У суме ж атрымалася шэсць пратаколаў за ўдзел у акцыях і заклікі да ўдзелу ў іх. Па ўсіх шасці судзілі, і я прысутнічаў на судах. Вазілі туды пад канвоем.
– Хто яшчэ быў на судах?
– Я, суддзя, сакратар суда і канвой. З грамадскасці пра іх ніхто не ведаў, і нават я даведваўся пра пачатак працэса ў апошні момант. Сядзіш у камеры, прыходзіць дзяжурны і кажа: “Казлоў, збірайся на чарговы суд”.
– Адвакат вас не наведваў?
– 14 студзеня прыйшла жанчына, якую адправіў віцебскі праваабаронца Павел Левінаў, каб тая пацікавілася, колькі на мяне складзена пратаколаў і за што. Інфармацыя пра мяне была супярэчлівая, а я, натуральна, нічога напісаць на волю з гэтай нагоды не мог. Такую карэспандэнцыю проста не прапусцілі б.
– Штрафы таксама вам прысудзілі?
– Я дакладна ведаю, што тры штрафы ў мяне ўжо былі яшчэ да таго, як патрапіў у ізалятар.
– На вас засталося “вісець” яшчэ 80 сутак адміністрацыйнага арышта…
– Так, у любы момант могуць ізноў кінуць за краты. Праўда, праваабаронцы кажуць, што проста так гэта рабіць не будуць, а выкарыстаюць нейкі зручны момант, калі патрэбна будзе ізаляваць перад якімі-небудзь святамі ці перад выбарамі.
– Якія вашы далейшыя планы?
– Буду займацца тым жа, чым і раней – наведваць нейкія мерапрыемствы, праводзіць прамыя трансляцыі. Праўда, ужо цвёрдых планаў не складзеш, бо, як ужо казаў, закрыць могуць у любы час.
– Акрамя відэаблогерства чым-небудзець яшчэ займаецеся?
– Гэтая справа займае ўвесь мой час, таму на нейкую іншую працу яго проста не застаецца. Відэаблогерства – гэта маё і хобі, і вобраз жыцця, і сродак для існавання.
palitviazni.info
Фота: spring96.org