Еўрадэпутаты просяць дазволу на сустрэчу з беларускімі палітвязнямі

Дэлегацыя Еўрапарламенту ў складзе 4-х дэпутатаў напрыканцы кастрычніка плануе прыехаць у Беларусь дзеля сустрэчаў з прадстаўнікамі Міністэрства замежных спраў, міністрам юстыцыі і міністрам унутраных спраў, а таксама з прадстаўнікамі грамадзянскай супольнасці. Найважнейшая мэта паездкі – сустрэча з палітвязнямі.

На такую сустрэчу неабходная згода беларускага боку, – кажа старшыня дэлегацыі Еўрапарламенту ў справах Беларусі Філіп Качмарэк:

– Так, мы папрасілі пра такую магчымасць. Да беларускага боку мы звярнуліся з лістом. Калі мы не атрымаем дазвол на сустрэчу з палітвязнямі, то сустрэнемся з іх сем’ямі. Гэта будзе толькі палавінчаты поспех з нашага боку.

Першы сакратар Беларускага прадстаўніцтва пры ЕС у Брусэлі, дзе ўзгадняецца план паездкі еўрадэпутатаў, адзначае, што пытанне наведвання палітвязняў імі не разглядаецца.

– Гэтае пытанне не стаіць, таму што гэта пярэчыць усяму нашаму заканадаўству. І такія пытанні не вырашаюцца на маім узроўні і на ўзроўні пасольства. Тут трэба выканаць пэўныя юрыдычныя працэдуры. Таму я не магу нешта каментаваць, або рабіць нейкія прагнозы.

Планаваная на ліпень паездка еўрадэпутатаў у Беларусь была адтэрмінаваная, паколькі беларускі бок паставіў умову сустрэчы з дэпутатамі непрызнанага Еўразвязам беларускага парламенту.

racyja.com

 

Зьвязаныя навіны:

Іншыя палітычныя вязьні