Адвакат Людміла Казак нагадала пра тое, што 8 студзеня ў Марыі Калеснікавай заканчваецца чатырохмесячны тэрмін утрымання пад вартай.
“Усе мы, безумоўна, спадзяемся, што Марыя ў хуткім часе апынецца на волі”, – кажа Людміла Казак.
Нагадаем, што Марыя ўзначальвала штаб Віктара Бабарыкі, які вылучаўся на пасаду прэзідэнта Беларусі на выбарах-2020.
7 верасня Калеснікава была выкрадзена невядомымі ў цэнтры Мінска. Раніцай 8 верасня з’явілася інфармацыя аб тым, што яе спрабавалі сілком дэпартаваць з Беларусі ва Украіну, але яна парвала свой пашпарт і зноў была затрыманая.
16 верасня Следчы камітэт Беларусі прад’явіў Калеснікавай абвінавачванне па ч. 3 арт. 361 КК Рэспублікі Беларусь (заклікі да дзеянняў, накіраваных на прычыненне шкоды нацыянальнай бяспецы, учыненыя з выкарыстаннем СМІ і сеткі інтэрнэт). Артыкул прадугледжвае пакаранне ад 2 да 5 гадоў пазбаўлення волі.
“У справе зараз, па вялікім рахунку, нічога асаблівага не адбываецца, – кажа Людміла Казак. – Мы абскарджваем пэўныя прынятыя рашэнні ў дачыненні да Марыі, а таксама перыядычна хадайнічаем аб змяненні меры стрымання, і цяпер рыхтуем чарговае асабістае даручальніцтва.
8 студзеня ў Марыі Калеснікавай заканчваецца чатырохмесячны тэрмін утрымання пад вартай, але, мяркую, ужо да канца гэтага году будзе вядома, ці працягнуць ёй тэрмін знаходжання ў ізалятары далей. Калі так, то пачнем новы цыкл абскарджванняў.
Але мы, безумоўна, спадзяемся, што Марыю выпусцяць на волю. Такая надзея застаецца”.
Са слоў адваката, таксама ёсць праблема з ліставаннем, бо не ўсе лісты прыходзяць у ізалятар і выходзяць з яго.
“Нам афіцыйна адказалі, што на мінулым тыдні Марыя атрымала 14 лістоў, але толькі родныя і блізкія адправілі ў разы больш, – адзначае адвакат. – З адпаведным запытам мы зараз звярнуліся ў Дэпартамент выканання пакаранняў МУС Беларусі, бо праблема з перапіскай як была раней, так захоўваецца і да гэтага часу”.
palitviazni.info