Пра гэта сайту palitviazni.info паведаміў адвакат палітвязня Уладзімір Сазанчук.
“Такім чынам, тэрмін утрымання пад вартай Мікалая Статкевіча працягнуты да 29 снежня”, – кажа адвакат.
Нагадаем, Мікалай Статкевіч быў затрыманы 31 мая ў Мінску, калі накіроўваўся на пікет па зборы подпісаў за вылучэнне “кандыдатаў пратэсту”.
На наступны дзень суд пастанавіў арыштаваць яго на 15 сутак за ўдзел у несанкцыянаваным масавым мерапрыемстве. Падчас адбыцця пакарання яму прызначылі яшчэ адзін 15-сутачны арышт.
8 ліпеня Статкевічу прад’явілі абвінавачанне па ч.1 арт.342 КК (“Падрыхтоўка дзеянняў, што груба парушаюць грамадскі парадак”).
30 ліпеня Следчы камітэт паведаміў, што ў дачыненні да палітыка распачата справа па арт.13 і ч.2 арт.293 КК (“Падрыхтоўка да масавых беспарадкаў”), а 29 жніўня Статкевічу паведамілі пра падаўжэнне тэрміну зняволення яшчэ на два месяцы.
“Следчая паведаміла мне, што Статкевіч азнаёмлены з тым, што тэрмін яго ўтрымання працягнуты яшчэ на два месяцы, – кажа Уладзімір Сазанчук. – І гэта было даволі прадказальна.
Таксама, мяркуючы па ўсім, на два месяцы працягнуты тэрмін утрымання пад вартай і яшчэ аднаго падабароннага Зміцера Казлова (блогер “Шэры Кот”).
palitviazni.info