Актывіст Пётр Маркелаў 21 мая выйшаў з Цэнтра ізаляцыі правапарушальнікаў і распавёў сайту palitviazni.info пра здзекі ў ЦІПе і незвычайны выхад на волю.
“Прэсавалі па поўнай праграме”, – кажа актывіст.
13 мая суд Савецкага раёна Мінска асудзіў актывіста Пятра Маркелава на 10 сутак адміністрацыйнага арышту.
Актывіста абвінавацілі па двум адміністрацыйным артыкулам: 17.1 (хуліганства) і 23.4 КаАП (непадпарадкаванне) за тое, што ён “з хуліганскіх памкненняў ляжаў на лаўцы”, павдамляе spring96.org.
Нагадаем, 11 мая супрацоўнікі міліцыі затрымалі актывіста Пятра Маркелава ў судзе Савецкага раёна Мінска, калі ён чакаў суды над актывістамі “Моладзевага блоку”.
Як паведамілі актывісты ЗБС, яго затрымалі нібыта за тое, што ён ляжаў у судзе на лаўцы і не хацеў даваць дакументы. Дакументы міліцыянты ў яго запатрабавалі, бо нібы Маркелаў падобны на чалавека, які знаходзіцца ў вышуку.
“21 мая ў 11.30 мяне вывезлі з Цэнтра ізаляцыі правапарушальнікаў, хаця вызваленне павінна было адбыцца ў 14.25, — кажа Пётр Маркелаў. – Адвезлі ў РУУС Савецкага раёна, дзе я сядзеў да 14.25.
Далі падпісаць паперу аб вызваленні, пасля чаго ізноў затрымалі, не выходзячы з будынка. Затым мяне вазілі па горадзе, прывезлі ў апорны пункт, там ізноў падпісаў паперу, што са мной праведзена прафімлактычная размова і толькі пасля гэтага вечарам адпусцілі.
Ніхто так і не сказаў, на якой падставе і для чаго мне арганізавалі “турыстычную паездку” па Мінску”. Але пагражалі, а адзін з супрацоўнікаў міліцыі нават агрэсіўна сябе паводзіў – пастаянна штурхаў.
Відаць, у іх быў загад, каб мяне ніхто не сустрэў. Ды і проста вырашылі “праехацца” па нервах”.
Актывіст адзначае, што ў ЦІПе яму таксама давялося няпроста.
“І раней быў у такой установе, але гэтым разам было найбольш складана, – працягвае Пётр Маркелаў. – Над тымі актывістамі, хто быў у цэнтры, натуральным чынам здзекваліся.
У камерах нават ноччу гарэла яркае святло, начное адмыслова не запальвалі. Акрамя таго, каб мы не спалі, супрацоўнікі ЦІПа падымалі з ложака кожныя паўтары гадзіны.
Трэба было ўстаць, прадставіцца і сказаць, за што адбываеш пакаранне. Не кожны дзень такое практыкавалі, але некалькі дзён было.
У першы дзень мяне позна ўвечары выкінулі ў майцы ў прагулачны дворык, дзе было вельмі холадна. Гэта быў самы сапраўдны здзек!
Дарэчы, не перадалі ні кнігі, ні сшыткі, ні газеты. Ціснулі маральна, гэта было відавочна”.
У гэтым годзе Пётр Маркелаў ўжо трэці раз пабываў на “сутках”. Усяго за пяць месяцаў гэтага году ён правёў у Цэнтры ізаляцыі правапарушальнікаў 40 сутак.
palitviazni.info
Фота: svaboda.org
