5 снежня ў судзе Цэнтральнага раёна Мінска Наста Гусева была аштрафавана на 765 рублёў за тое, што збірала грошы для палітвязняў.
“Мы ўсе ў гэтай краіне ў пэўным сэнсе палітычныя закладнікі”, – пракаментавала прысуд сайту palitviazni.info Наста Гусева.
Учора ў судзе Цэнтральнага раёна Мінска разглядаліся адміністрацыйныя справы ўдзельнікаў перадвыбарных пікетаў і мітынгаў 8 і 16 лістапада. Шмат актывістаў аштрафавалі на сумы ад 30 да 50 базавых велічынь, Наста Гусева за ўдзел ў «Сустрэчы свабодных людзей», які арганізаваў блогер NEXTA на плошчы Свабоды ў Мінску 8 лістапада, павінна заплаціць 765 рублёў.
“Калі дзяржава лічыць збор ахвяраванняў у падтрымку палітвязняў злачынствам, то тут больш няма чаго дадаць, – кажа Наста Гусева. – Зрэшты, мы ўсе ў гэтай краіне ў пэўным сэнсе палітычныя закладнікі.
Дарэчы, ёсць відэа, дзе я здзяйсняю “злачынства”, і яго праглядалі ў судзе, але чамусьці без гука. Мабыць, сорамна было людзям недзе на ўзроўні падсвядомасці”.
Наста Гусева дадае, што 6 снежня яе чакае яшчэ адзін суд:
“Мабыць, будуць судзіць за чарговую “Сустрэчу свабодных людзей”. На мяне тады напалі, зламалі штатыў і пашкодзілі руку”.
palitviazni.info
Фота: nn.by