Адзін з абаронцаў Курапатаў Іларыён Трусаў распавёў сайту palitviazni.info, чым закончыўся яго паход у камісію па справах непаўнагадовых.
“Сказалі, што калі на мяне будзе складзены чацвёрты пратакол, то ёсць перспектыва патрапіць у спецшколу”, – кажа суразмоўца.
15-гадовы Іларыён Трусаў – маладафронтавец, з красавіка прымае ўдзел у курапацкай варце ля рэстарана “Поедем-поедим”.
Хлопец вучыцца ў Мінскім дзяржаўным архітэктурна-будаўнічым каледжы, а сям’ю за тое, што ён прымае ўдзел у акцыях і на яго складаюць пратаколы, паставілі на ўлік у камісію па справах непаўнагадовых і ў дзіцячы пакой міліцыі.
“На пасяджэнне камісіі хадзіў я з маці, а таксама сацыяльны педагог з каледжа, – кажа Іларыён Трусаў. – Таксама прысутнічаў намеснік кіраўніка адміністрацыі Маскоўскага раёна.
Адзначылі, што на мяне за год праваахоўнікамі складзены ўжо трэці пратакол і давялі, што, паводле нейкага закона, пры складанні чацвёртага пратакола вымушаны будуць звяртацца ў суд, каб накіраваць мяне ў “вучэбна-выхаваўчую ўстанову закрытага тыпу” – Магілёўскую спецшколу”.
Грамадскі актывіст не прызнае складзеныя на яго пратаколы.
“Калі ты нічога не парушаеш, а цябе абвінавачваюць, то як гэта разумець? – кажа Іларыён Трусаў. – Пратаколы могуць скласці ні за што на любога і нічога не дакажаш”.
Тым не менш, перспектыва спецшколы Іларыёна Трусава таксама не радуе:
“Зараз буду больш асярожна сябе весці падчас курапацкай варты, каб не паддавацца на правакацыі. А вось у каледжы ніякіх пытанняў да мяне няма, хаця я там таксама знаходжуся на прафілактычным уліку”.
palitviazni.info
Фота: nn.by