Паэт і былы палітвязень Уладзімір Някляеў распавёў, калі вернецца з творчай камандзіроўкі дадому.
“Што можа адбывацца ў Беларусі новага? — кажа суразмоўца. – Як быццам праходзяць нейкія выбары, хаця ты разумееш, што насамрэч нічога не робіцца. Усё замерла і стаіць на месцы, нават паглыбляецца ў сваім негатыве…”
Нагадаем, што зараз былы кандыдат у прэзідэнты і палітвязень Уладзімір Някляеў апошнія некалькі месяцаў знаходзіцца ў шведскім горадзе Лунд, дзе працуе над раманам пра Янку Купалу.
“Мне тут вельмі добра працуецца, раман ужо практычна закончаны, – кажа Уладзімірр Някляеў. – Думаю, праца будзе скончана да канца гэтага году. Калі раман будзе гатовы, то, уласна кажучы, у Лундзе мне ўжо няма чаго рабіць. Калі я ехаў у Швецыю, то ў мяне была толькі адна задача – закончыць твор…”
Са слоў Уладзіміра Някляева пасля таго, як яго ў 2010 годзе сілавікі і збілі і кінулі ў СІЗА КДБ, праблемы са здароўем да гэтага часу нагадваюць пра сябе.
“Зараз мне вельмі баліць спіна, – прызнаецца ён. – Практычна не магу сядзець, амаль увесь час даводзіцца знаходзіцца ці ў вертыкальным стане, ці ляжаць. Праўда, лежачы на ложку, пісаць нязручна, працую над раманам стоячы. Канторкі ў мяне няма, таму паставіў на стол крэсла, на крэсла – камп’ютар, так і друкую тэкст. Гэта вельмі складана, але тое, што зроблена, таго вартае. Каля двух месяцаў я практычна не адыходзіў ад стала”.
За падзеямі на палітычным полі Беларусь палітык практычна не сочыць
“Што можа адбывацца ў Беларусі новага? — здзіўляецца суразмоўца. – Як быццам праходзяць нейкія выбары, хаця ты разумееш, што насамрэч нічога не робіцца. Усё замерла і стаіць на месцы, нават паглыбляецца ў сваім негатыве. У Беларусі наогул нейкае адмоўнае энергетычнае поле, мне там нават цяжка пісаць, бо з усіх бакоў ідзе адмоўная інфармацыя.
І больш за дваццаць гадоў безвыніковай бегатні. Усе заняты, бегаюць, як тараканы, то на гэтыя выбары, то на іншыя, але ўсё гэта бессэнсоўная таўкатня”.
palitviazni.info
