Фігуранты гэтай справы Генадзь Фядыніч і Ігар Комлік па-ранейшаму адбываюць пакаранне на “дамашняй хіміі” і спадзяюцца, што міжнародная грамадскасць дасць сваю ацэнку вынесенаму прысуду.
“Наколькі вядома, Міжнародная арганізацыя працы (МАТ) запатрабавала ад беларускага ўрада, каб былі прадастаўлены дакументы па “справе прафсаюзаў”, – распавёў Ігар Комлік сайту palitviazni.info.
Нагадаем, што ў жніўні 2018 года суд Савецкага раёна прыгаварыў кіраўнікоў прафсаюза РЭП Генадзя Фядыніча і Ігара Комліка да 4 гадоў абмежавання волі без накіравання ва ўстановы адкрытага тыпу з забаронай займаць кіруючыя пасады тэрмінам на 5 гадоў.
Іх прызналі вінаватымі на падставе ч.2 арт.243 Крымінальнага кодэкса Рэспублікі Беларусь («ухіленне ад выплаты падаткаў у значнай суме»), а праваабаронцы назвалі гэтую справу палітычна матываванай.
Тэхніку, якую следчыя забралі падчас ператрусаў у жніўні 2017 года, вяртаць не спяшаліся, але зараз вырашылі вярнуць.
“Не выключаю, што гэта адбылося пад ціскам міжнародных прафсаюзаў, бо МАП запатрабавала ад нашага ўрада копіі дакументаў з гэтай справы, а таксама неабходныя тлумачэнні па вынесенаму прысуду, – кажа Ігар Комлік. – Урад павінен даў быць адказ да гэтага месяца. Далей справа, напэўна, будзе разгледжана і ў Камітэце па правах чалавека ААН”.
Прафсаюзны лідар адзначае, што ніякай доказнай базы ў судзе прадстаўлена не было, таму, калі ўважліва прааналізуюць справу, то прфсаюзных лідараў прызнаюць невінаватымі хаця б на міжнародным узроўні. Хаця гэта прынясе хіба што маральнае задавальненне.
“Са свайго боку мы таксама прадаставілі ў Міжнародную арганізацыю працы копіі дакументаў з крымінальнай смправы, якія ў нас былі”, – дадае суразмоўца.
palitviazni.info