Адміністрацыя Бабруйскай калоніі ўзмацніла ціск на палітвязня Зміцера Паліенку, які прыкладна праз месяц павінен выйсці на волю.
“Зняволеным забаранілі мець зносіны са Змітром пад пагрозай перавода ў іншы атрад”, – паведаміла сяброўка актывіста Марына Насенка.
Нагадаем, што 25 верасня Аляксандр Паліенка, бацька палітзняволенага, збіраўся на доўгатэрміновае спатканне з сынам, але яго адмянілі. Адміністрацыя калонія зрабіла ў рэчах Змітра шмон: забралі ўсе лісты, паштоўкі і асадкі, лісты, якія ён хацеў дасылаць на днях сам, у тым ліку запісы з тэлефонамі родных. Маўляў, гэтыя рэчы “не адпавядаюць спісу”, а таму і адмянілі спатканне.
“Зміцеру патлумачылі, што ў яго рэчах былі забароненыя прадукты, – удакладніла Марына Насенка. – Пры тым, што ўсе перадачы правяраюцца, а іншыя прадукты можна набыць толькі на месцы! Акрамя таго, наколькі мне вядома, забралі ў Паліенкі таксама нататнік і скаргу, якую ён пісаў. Яго лісты да нас так і не дайшлі”.
Са слоў Марыны Насенка, апагеем здзекаў стала забарона зняволеным, якія камунікуюць са Змітром, мець з ім зносіны пад пагрозай перавода ў іншы атрад. А некаторых за камунікацыю з ім спецыяльна публічна і перавялі.
“Акрамя гэтага, тузаюць аператыўнікі, – дадае Марына. – Грошы Зміцер прасіў не дасылаць, але давайце падтрымаем яго лістамі і паштоўкамі. Трэба паказаць яму, што ён не адзін і дапамагчы вытрымаць апошні месяц здзекаў турэмнай сістэмы”.
Зміцер Паліенка павінен выйсці на волю 24 кастрычніка.
***
Зміцер Паліенка – сацыяльны актывіст з Мінска. Нагодай для крымінальнага пераследу стаў ягоны ўдзел у мірным сходзе “Крытычная маса”, які адбываўся 29 красавіка 2016 г. у Мінску і быў гвалтоўна спынены міліцыяй.
12 кастрычніка 2016 года судом Цэнтральнага раёна г. Мінска прызнаны вінаватым у здзяйсненні злачынства, прадугледжанага артыкулам 364 Крымінальнага кодэкса (гвалт альбо пагроза ўжывання гвалту ў дачыненні да супрацоўнікаў органаў унутраных справаў) і часткай 2 артыкула 343 КК (выраб і распаўсюд парнаграфічных матэрыялаў або прадметаў парнаграфічнага характару). Паводле прысуда, З. Паліенка быў прыгавораны да двух гадоў пазбаўлення волі з адтэрміноўкай выканання пакарання на два гады.
7 красавіка 2017 года судом Заводскага раёна г. Мінска разгледжана прадстаўленне органа, які ажыццяўляе кантроль за паводзінамі асуджанага (хутчэй за ўсё, УУС Заводскага раёна), і адменена адтэрміноўка выканання пакарання. У сувязі з гэтым, без права на абскарджванне, актывіст падлягае накіраванню ў папраўчую калонію для адбыцця пакарання ў выглядзе пазбаўлення волі тэрмінам на 1,5 гады (з улікам часу ўтрымання пад вартай да суду ў 2016 годзе).
Зміцеру Паліенку можна дасылаць лісты падтрымкі (лепш – замоўныя) па адрасе: 213800 Магілёўская вобласць, г.Бабруйск, вул.Сікорскага, 1. ПК-2, атрад № 9.
palitviazni.info