Сайт “Радыё Свабода” паведаміў: Суд Маскоўскага раёну сталіцы 12 верасьня арыштаваў на 15 сутак актывіста моладзевай ініцыятывы «Зьмена» Паўла Вінаградава за брыдкаслоўе. Таксама яго пакаралі штрафам у паўтара мільёна рублёў за парушэньне правілаў прэвэнтыўнага нагляду і штрафам у 450 тысяч рублёў за расьпіваньне сьпіртных напояў у грамадзкім месцы.
Паводле сьведак-міліцыянтаў Канцавога і Вярбіцкага, Павал нібыта 11 верасьня піў піва на стадыёне каля пастарунку. Але вядома, што 11 верасьня ён цягам дня знаходзіўся ў пастарунку. Аднак і тут судзьдзя Тацяна Матыль прызнала яго вінаватым. Павал заяўляў адвод судзьдзі, аднак яна яго адхіліла.
Актывіст прызнаў сябе вінаватым толькі ў парушэньні правілаў прэвэнтыўнага нагляду: калі да яго прыйшлі з праверкай міліцыянты, ён выйшаў з дому.
11 верасьня раніцай Павал пайшоў у пастарунак, каб адзначыцца згодна з умовамі прэвэнтыўнага нагляду. Аднак дахаты ён ужо не вярнуўся.
Былы палітвязень Павал Вінаградаў — рэкардсмэн па адвольных затрыманьнях. У сакавіку ён быў асуджаны на 25 сутак арышту і трымаў галадоўку.
У жніўні Вінаградава арыштавалі на 10 сутак. Ён апавёў, што гэта яго 16-я адміністрацыйная справа, і з гэтага ліку 9 былі па абвінавачаньні ў лаянцы.
