Дэлегаты VI з’езда беларусаў свету, які праходзіць у Мінску 23—24 ліпеня пад эгідай міжнароднай грамадскай арганізацыі “ЗБС “Бацькаўшчына”, заклікалі ўлады Беларусі вызваліць палітзняволеных. Пра гэта гаворыцца ў прынятай сёння на з’ездзе калектыўнай заяве “Аб акце добрай волі”.
Дакумент выклікаў пратэст з боку групы дэлегатаў, пераважна з Украіны, якія аргументавалі сваю пазіцыю тым, што “гэта — унутраная справа Рэспублікі Беларусь”. Пытанне выклікала бурнае абмеркаванне, аднак толькі восем чалавек выказалася за зняцце гэтай заявы з парадку дня.
Былы кіраўнік Вярхоўнага савета Беларусі Станіслаў Шушкевіч прапанаваў, акрамя вызвалення палітзняволеных, запатрабаваць яшчэ іх поўнай рэабілітацыі, а таксама згадаць у заяве тых палітэмігрантаў, якія не могуць вярнуцца ў Беларусь, баючыся за сваё жыццё і свабоду. Аднак абедзве гэтыя папраўкі не былі ўнесеныя ў выніковы тэкст.
У заяве гаворыцца, што клопат грамадзян пра будучыню сваёй краіны — гэта нармальная з’ява, якая заслугоўвае пашаны і павагі. “Натуральным з’яўляецца тое, што не ўсе людзі аднолькава ацэньваюць розныя дзеянні ўлады, найперш тыя, якія датычацца пытанняў унутранай і замежнай палітыкі, перспектыў захавання незалежнасці краіны”, — адзначаецца ў дакуменце.
Яго аўтары падкрэсліваюць: “Моцная ўлада, упэўненая ў сваёй слушнасці, вядзе дыялог са сваімі палітычнымі апанентамі”.
“На жаль, у Беларусі і сёння ёсць людзі, пазбаўленыя свабоды за свае палітычныя перакананні, якія не супадаюць з афіцыйным меркаваннем, і не маюць магчымасці ўдзельнічаць у такім дыялогу”, — адзначылі аўтары заявы, дадаўшы, што міжнародная супольнасць называе такіх людзей палітычнымі зняволенымі.
“У пабудове моцнай незалежнай Беларусі вельмі важнымі з’яўляюцца адзінства нацыі, разуменне ўсімі грамадзянамі каштоўнасцяў дэмакратыі і суверэнітэту, — сказана ў прынятым дакуменце. — Улада павінна аб’ядноўваць людзей, быць справядлівай і добразычлівай да ўсіх грамадзян краіны незалежна ад іх палітычных поглядаў. Жорсткасць не стварае, а разбурае”.
“Мы заклікаем улады Беларусі зрабіць акт добрай волі і вызваліць з месцаў зняволення людзей, якія знаходзяцца там у пакаранне за свае палітычныя перакананні. Мы ўпэўненыя, што такія дзеянні кіраўніцтва краіны будуць пазітыўна ацэненыя народам Беларусі і міжнароднай супольнасцю”, — рэзюмавалі аўтары заявы.
Паводле даных праваабаронцаў, у Беларусі налічваецца як мінимум 10 палітзняволеных. Самыя вядомыя сярод іх — экс-кандыдат у прэзідэнты Мікалай Статкевіч, праваабаронца Алесь Бяляцкі, апазіцыйныя палітыкі Павел Севярынец і Дзмітрый Дашкевіч.
belapan.com
