У Каваленкі вага — 55 кіляграмаў, тэмпэратура — 37,5 градусаў, ціск 90 на 60

7 сакавіка галадоўніка Сяргея Каваленку з «Валадаркі» прывозілі на агляд у 9-ты клінічны шпіталь.

Пра гэта «Свабодзе» паведаміў намесьнік старшыні КХП БНФ Юрась Беленькі, які апякуецца Каваленкам. Паводле яго, Каваленку, які галадуе з перапынкамі зь сярэдзіны сьнежня, агледзеў прафэсар Валянцін Кураш.

Беленькі: «У Каваленкі былі зафіксаваныя наступныя фізычныя парамэтры: вага — 55 кіляграмаў, тэмпэратура — 37,5 градусаў, ціск 90 на 60.

Дактары 9-й клінікі прапанавалі Сяргею спыніць галадоўку і паабяцалі, што пасьля гэтага яго пакінуць у шпіталі для выхаду з галадоўкі пад мэдычным наглядам. Але Каваленка адмовіўся спыняць галадоўку, бо не давярае мэдыкам і міліцыянтам. У выніку яго зноў вярнулі на Валадарку».

Сёньня ж, 7 сакавіка, Сяргея Каваленку наведаў на «Валадарцы» адвакат. Сустрэча адбылася ў межах падрыхтоўкі да разгляду касацыйнай скаргі на прысуд Каваленку.

Сяргей Каваленка асуджаны на 2 гады і месяц зьняволеньня за парушэньні адбыцьця пакараньня хатняй «хіміяй» за вывешваньне бел-чырвона-белага сьцяга на навагодняй ёлцы ў Віцебску.

svaboda.org

Іншыя палітычныя вязьні

  • Яўген Скочка
  • Васіль Парфянкоў
  • Анатоль Букас
  • Павал Сырамолатаў
  • Сяргей Башарымаў