Вярхоўны суд у апошнія дня адхіліў некалькі наглядных скаргаў на прысуды палітычных вязняў, пакінуўшы іх бяз зменаў. Але родныя палітвязняў кажуць, што абскардзяць прысуды ў міжнародных інстанцыях.
Па словах жонкі зняволенага экс-кандыдата ў прэзідэнты Андрэя Саннікава Ірыны Халіп, зараз адвакаты рыхтуюць скаргу ў Камітэт па правах чалавека ААН:
– У Беларусі мы ўжо прайшлі ўсе інстанцыі, таму наступны наш крок, зварот у Камітэт па правах чалавека ААН. Гэта адзіная ўстанова, куды могуць звяртацца беларусы. Калі напрыклад грамадзяне Расіі могуць звяртацца ў Еўрапейскі суд па правах чалавека, то беларусы не могуць, бо Беларусь не з’яўляецца чальцом Рады Еўропы.
Аналагічная сітуацыя з палітвязнем, лідарам “Маладога Фронту” Змітром Дашкевічам – распавядае яго намесніца па арганізацыі Наста Палажанка:
– Мы прайшлі Мінскі гарадскі суд, раённы суд, пасля мы прайшлі Вярхоўны суд, дзве апеляцыі. У прынцыпе ўсё, што мы маглі ў беларускіх інстанцыях, мы зрабілі. У нас застаўся толькі апошні шанец, пісаць у Камітэт па правах чалавека ААН. У Зміцера пакуль нічога асабліва не змяняецца, ён па ранейшаму знаходзіцца адзін, на ўмовы не скардзіцца.
Вярхоўны суд пакуль не даў адказу на наглядную скаргу палітвязня, экс-кандыдата ў прэзідэнты Мікалая Статкевіча.
Еўрапейская і міжнародная супольнасці неаднарозава заклікалі Аляксандра Лукашэнку неадкладна вызваліць і рэабілітаваць усіх палітычных зняволеных у Беларусі.
racyja.com