Статкевіч “схільны да нападу і ўцёкаў”

Жонка палітвязня распавяла журналістам “Белсату”, пра што піша ў сваіх лістах Мікола Статкевіч.

“Доўгі час, ні са Шклова, ні з Магілёва я ад яго лістоў не атрымлівала, хоць ведаю, што іх было напісана дастаткова шмат”, – гаворыць Марына Адамовіч. Жонка асуджанага кандыдата на прэзідэнта атрымала два невялікія лісты, якія Мікола Статкевіч напісаў адразу па выхадзе са штрафнога ізалятару шклоўскай калоніі. “Першы ліст літаральна на паўстароначкі – Мікола спяшаўся напісаць, каб я не хвалявалася, паведаміць, што ён выйшаў з ШІЗА, што ён у камеры і што пасля паўтарамесячнага перабывання ў адзіночным зняволенні адаптуецца пакрысе да турэмных умоваў”, – распавядае жонка палітвязня.

З першага ліста Марына Адамовіч даведалася, што адміністрацыя шклоўскай калоніі прызнала Міколу Статкевіча “схільным да нападу і да ўцёкаў”. “Мабыць, з гэтай нагоды ў Магілёве ў яго забралі цюбік з гелем для галення. Як жартуе Мікола, мабыць, каб не напаў з металічным цюбікам на мясцовую адміністрацыю”.

У другім лісце палітвязень піша пра этапаванне ў Магілёў. “Ён піша, што ўмовы ў турэмным карцэры больш жорсткія, чымся ў калоніі, на ноч там не выдавалі тую самую ватоўку, якую забавязаныя выдаваць вязням, асабліва зімовым часам, – гаворыць Марына Адамовіч. – І дастаткова радасна паведамляе, што ў яго цяпер ёсць мажлівасць гуляць цягам гадзіны ў турэмным дворыку, праўда, у суправаджэнні сабакаў. Ён жартуе: ты ж ведаеш, як я люблю сабакаў, так што ў мяне цяпер ёсць магчымасць бачыць іх кожны дзень”.

“І самае істотнае, што я хацела б данесці: Мікола просіць падзякаваць людзям, якія яго падтрымліваюць, і просіць перадаць ім, што іхныя словы – у ягоным сэрцы, нават калі ён не здолеў адказаць – праз аб’ектыўныя прычыны. Вялікі дзякуй”, – дадала Марына Адамовіч.


belsat.eu

- у навінах

 

Зьвязаныя навіны:

23.05.2017 “Цалкам рэальна, што некаторых фігурантаў “справы патрыётаў” могуць асудзіць…”

24.02.2017 Мікалай Статкевіч: Ёсць чырвоная рыса, за якую не можам перайсці ні мы, ні ўлада

30.01.2017 Мікалай Статкевіч: Сёння ўлады не могуць сабе дазволіць раскідаць усіх па турмах…

06.09.2016 Былыя палітвязні рыхтуюцца да акцыі “Вярні выбары”

23.08.2016 Былы палітвязень Мікалай Статкевіч на гадавіну свайго вызвалення адкаркаваў армянскі каньяк 1968 году

12.08.2016 Мікалай Статкевіч: Найлепшы падарунак для мяне – свабода для нашай краіны

06.07.2016 Мікалай Статкевіч: Гэта ў пэўнай ступені акцыя салідарнасці з былымі палітвязнямі!

20.06.2016 Мікалай Статкевіч: Трэба як мага больш палітызаваць парламенцкую кампанію

20.05.2016 Пытанне санкцый: быць альбо не быць?

12.05.2016 Мікалай Статкевіч: Няхай самі думаюць, якія яшчэ шкарпэткі можна ў мяне скрасці

Іншыя палітычныя вязьні